२०७९ असोज १८ मङ्गलबार

राशिफल

ठाकुरकी छोरी समानुपातिकको एक नम्बरमा परेपछि लोसपामा विवाद

काठमाडौं : असोज ५–निर्वाचन आयोगमा बुझाएको समानुपातिक सूचीलाई लिएर लोकतान्त्रिक समाजवादी पार्टीमा विवाद देखिएको छ । शीर्ष नेताको सहमतिबाट बनेको सूचीभन्दा फरक सूची आयोगमा दर्ता भएको भन्दै सो पार्टीका वरिष्ठ नेताहरू राजेन्द्र महतो र शरतसिंह भण्डारीले असन्तुष्टि जनाएका छन् । बानेश्वरमा बसेको शीर्ष नेताहरूको गोप्य बैठकमा उनीहरूले पार्टी अध्यक्ष महन्थ ठाकुरप्रति असन्तुष्टि जनाएको स्रोतले जनाएको छ ।

स्रोतका अनुसार पाँच शीर्ष नेताको सहमतिमा बनेको सूचीलाई अध्यक्ष ठाकुरले फेरबदल गरेको आरोप उनीहरूको रहेको छ । अध्यक्ष ठाकुरले प्रतिनिधिसभा र प्रदेशसभामा आफ्ना निकटको नाम मात्र हालेर बसेको गुनासो नेता महतो र भण्डारीको रहेको छ । यिनै विषयलाई लिएर उनीहरूको बीचमा भनाभन समेत भएको बताइएको छ ।

अध्यक्ष ठाकुरले आफ्नो छोरी मिनाक्षी ठाकुरको नाम प्रतिनिधिसभा समानुपातिक उम्मेदवारको सूचीको एक नम्बरमै नाम राखेका छन् । त्यस्तै प्रदेशको समानुपातिक उम्मेदवारको सूचीमा उनले आफ्नो आफन्त अजय झाको नाम एक नम्बरमा राखिएको छ । दुई नम्बरमा केशव झाको नाम राखिएको छ । त्यस्तै रामकुमार मण्डल, रुपा यादव र अञ्जु बैठाको नाम पनि सूचीमा राखेर पठाइएको छ ।